Komunikado di Prensa Pelíkula animá riba funshonamentu di Konseho di Konsulta Kòrsou

KOMUNIKADO DI PRENSA

Pelíkula animá riba funshonamentu
di Konseho di Konsulta

WILLEMSTAD – Konseho di Konsulta di Kòrsou (RvAC òf Konseho), e órgano pa konseho konstitushonal di mas haltu di gobièrnu i parlamento pa loke ta legislashon i atministrashon, ta bai pone un siguiente paso pa hendenan komprendé su funshonamentu mihó pa esnan di interes, entre nan e públiko general. P’esei ta lansa un pelíkula animá dirigí kaminda ta splika mas aleu e tarea i ròl di RvAC den nos estado di derecho demokrátiko, i tambe e manera di traha.

Kasi tres aña pasá e Konseho a presentá su website nobo pa klarifiká su meta i tareanan pa un públiko mas amplio i tambe pa di e forma ei hasi e konsehonan ku nan a presentá mihó aksesibel pa un i tur ku ke sa mas di nan. Finalmente esaki lo mester kondusí na mas komprenshon den tur gremio di komunidat di e papel ku e Konseho ta hunga dentro nos estado di derecho demokrátiko.

Evaluashon krítiko

Realisá mas visibilidat di RvAC komo órgano konsultativo ta keda hopi importante. Tur esnan konserniente den e proseso di preparashon di un lei komo den gobernashon i tambe e públiko general mester sa di e posishon konstitushonal di e Konseho. Den kuadro di ta mas habrí tokante tantu e tarea i ròl komo e manera di traha di e kolegio haltu di estado aki, RvAC a laga traha un pelíkula animá estilo kartun na Hulandes i Papiamentu. Den dje ta splika na lenguahe simpel, pa uso atraves di kanalnan digital, kon e Konseho ta funshoná pa konsehá gobièrnu i parlamento.

Ya ku no semper ta komprendé kua ròl RvAC ta hunga dentro di nos estado di derecho demokrátikó, den e grabashon ta splika na un manera komprensibel ku RvAC por duna gobièrnu konseho no solistá ora e haña esaki nesesario den kaso ku esaki ta na interes di pais òf di Reino. Ademas, ta splika ku e Konseho ta studia tur proposishon pa lei i areglonan nobo. Por ehèmpel, den su evaluashon e Konseho ta wak si e proposishonnan ta logra e ophetivo ku ke alkansá, si nan no ta en pugna ku otro lei, tratado òf areglo, i si nan ta téknikamente bon trahá. E idea tras di esaki ta ku un evaluashon minusioso i krítiko di e proposishonnan ta kontribuí na mantenshon i fortifikashon di e estado di derecho demokrátiko. Esaki na su turno ta esensial pa garantisá un bon ekilibrio entre gobièrnu, parlamento i poder hudisial.

Lansamentu

Ta lansa e pelíkula animá kompakto ofisialmente riba dia 7 di mei 2026 riba e website renobá di RvAC www.raadvanadvies.cw den un siguiente paso pa realisá mas konosementu di e papel i trabou di e Konseho.

Na nòmber di e vísepresidente di Konseho di Konsulta

Sekretario, sra. mr. C. Raphaëla.