Komunikado di Prensa Relato anual 2023 di Konseho di Konsulta Papiamentu

KOMUNIKADO DI PRENSA

10 di yüli 2024.

Konseho di Konsulta ta pidi atenshon spesial pa kumplimentu ku norma internashonal

Willemstad – Desaroyonan interno krusial, asuntunan hurídiko grandi, i un tendensia persistente di petishon pa konseho urgente, ta karakterisá e relato anual di Konseho di Konsulta Kòrsou pa 2023. E Konseho ta bisa sí ku tòg por konsiderá 2023 komo un ‘aña normal’ despues di e añanan di krisis durante i djis despues di Covid.  

Norma di kondukta nobo

Na mart 2023 e Konseho a adoptá normanan di kondukta nobo pa sigui promové imparsialidat i independensia di e miémbronan en relashon ku funshonamentu di e Konseho komo un instansha di konseho imparsial i independiente, i e konfiansa ku hende mester tin den dje. E normanan akí ta trata partikularmente ekspreshonnan di e miémbronan, sea den kombersashon òf komportashon, via medionan sosial òf kualke otro forma. Por pensa por ehèmpel riba komportashon privá òf ekspreshon públikamente di opinion privá ku tòg por afektá independensia di e Konseho òf e konfiansa den e Konseho. Tambe lo skrudiñá puesto- òf funshonnan anterior di e miémbronan mas minusiosamente, òf puesto- i funshonnan ku nan lo por bin okupá den futuro serkano i ku no ta deseabel pa miembresia di e Konseho. Esaki ta amplia e normanan di kondukta usual pa revelá puesto i funshon.

Enkuanto e funshon interno di e sekretario sustituto ku lei ta preskribí, e visepresidente, na nòmber di e Konseho, a nominá sra. mr. Jennifer Josefa entrante 4 di sèptèmber 2023. E Lei Konseho di Konsulta ta stipulá ku den kaso di ousensia di e sekretario, e sekretario sustituto ta remplas’é. Pero e funshon di sekretario sustituto ainda no tabata kubrí.

Ku mira riba bon gobernashon, e Konseho a fiha komo liña di maneho ku un persona no por keda miémbro mas ku tres periodo di 5 aña. Esei ta inkluí tur periodo komo miémbro, tambe si e 15 añanan no tabata konsekutivo. Dor di stipulá e límite aki na durashon di e miembresia, ta evitá un vishon di túnel, ta habri oportunidat pa ekspertisio nobo i ta konsehá ku mas presishon.

Ekspertisio amplio tambe ta benefisiá dunamentu di bon konseho. Pasobra mester aserká problemanan for di diferente ángulo. E Konseho a ofresé gobièrnu un amienda di e Lei Konseho di Konsulta, pa subi e límite di edat pa su miémbronan di 70 pa 75 aña. Esaki ta un instrumento efikas pa mantené e ekspertisio nesesario ku e Konseho ta dispone di dje, mas ainda komo e subida di edat di penshun di amptenar pa 65 aña, a redusí e periodo pa nombra miémbronan ku konosementu gubernamental te efektivamente 5 aña. Na aprel 2024 gobièrnu a entregá Staten e proyekto di lei ku entre otro ta regla subida di e límite di edat proponé aki, i a trat’é kaba den Komishon Sentral.

Maneho mas strikto pa konseho urgente

Na 2023 tambe a sosodé ku gobièrnu a manda petishonnan pa konseho lat debí na tardansa den e trayekto di preparashon, entre otro dor di defisiensia den supervishon di progreso. Konseho di Konsulta a hasi su máksimo esfuerso pa kumpli mas tantu posibel. Pero tratamentunan urgente ta limitá e tempu ku ta krusial pa duna konseho adekuá. Ta bini aserka ku hopi biaha gobièrnu no ta motivá e karakter urgente di e petishon pa konseho. Entre otro pa vigilá kalidat, e Konseho a hasi su maneho pa konsehonan urgente mas strikto. Pa kada kaso e Konseho lo evaluá si tin motibu bálido pa urgensia, i te unda ta alkansabel pa duna konseho responsabel promé ku e periodo di tratamentu vense ku generalmente ta konta pa petishonnan pa konseho urgente.

Konseho ta realisá ku por tin motibu bálido pa konseho urgente. Por ehèmpel, pa no riska surpasá un periodo di implementashon di regulashonnan internashonal, pa evitá konsekuensia grave pa presupuesto, òf pa korihí un fayo den e regulashon urgentemente.

Generalmente un periodo di máksimalmente seis siman ta e norma pa petishonnan pa konseho urgente. Pero na 2023 Konseho di Konsulta mester a duna konseho dentro di sinku dia riba e proyekto di dekreto nashonal pa apuntá tutor di famia. E dekreto ta fiha regla pa supervishon di mucha. Dia 28 di yüni hues di promé instansia lo a nombra personanan ku minister di hustisia a designá, komo tutor di famia. Te dia 23 di yüni e Konseho a haña un petishon di gobièrnu pa duna konseho urgentemente riba e proyekto di dekreto nashonal.

Den e relato anual aki tambe e Konseho mester a mustra gobièrnu vários biaha riba e nesesidat pa reahustá e tendensia aki, na interes di kalidat di legislashon. Esei ta konta tambe i partikularmente pa reglamentunan ku mester drenta na vigor na un momentu akordá pa kumpli ku desaroyo i normanan internashonal.

Implementashon i kumplimentu ku norma internashonal meresé atenshon spesial

Konseho di Konsulta ta pidi mas atenshon pa e diskrepansia den Reino tokante protekshon di derechonan humano. Ta konstatá ku algun tratado importante riba e tereno aki ta aplikabel solamente pa e parti Europeo di Reino. Esei ta konta por ehèmpel pa tratadonan riba derecho di hende ku hèndikèp i riba prevenshon i kombatimentu di violensia kontra hende muhé i violensia doméstiko.

Mas en general tambe implementashon i kumplimentu ku norma internashonal na Kòrsou ta meresé atenshon spesial. Di un banda esaki ta i ta keda un reto debí na eskala chikitu, kapasidat limitá di ehekushon i ekspertisio riba terenonan krusial, i e situashon finansiero-ekonómiko prekario. Di otro banda por surgi konsekuensia drástiko tin ora si no apliká e normanan. E spagat aki ta hopi visibel den lus di e eksigensianan di Financial Action Task Force (FATF) riba tereno di wega di suerte (online), labamentu di plaka i finanshamentu di terorismo. FATF no tin e outoridat pa imponé su rekomendashonnan. Pero si no implementá nan i kumpli ku nan, Kòrsou por resultá riba un lista pretu òf shinishi di pais ku no ta koperá. Esei por tin konsekuensia negativo riba tereno finansiero-ekonómiko. Ke men e preshon ta grandi pa introdusí legislashon i regulashon ku ta korespondé ku e rekomendashonnan di FATF. Si pa kualke motibu no kuminsá prepará na tempu, e preshon ta krese so. I debí na e supervishon defisiente di progreso, e periodo pa konseho ku ta sobra pa Konseho di Konsulta, komo último renchi den e trayekto, ta resultá sémper bou di preshon.

Kompatibilidat di e proyekto di lei riba eksihensia pa kalidat di aire, ku EVRM

Gobièrnu a entregá Staten un proyekto di lei riba eksihensianan pa kalidat di aire. E proyekto di lei ta kontené normanan di emishon pa diferente sustansia ku ta kontaminá aire. Meta di e proyekto di lei aki ta pa limitá polushon di medio ambiente, partikularmente polushon di aire. E normanan proponé den e proyekto di lei, ta diferente di normanan internashonal manera esnan di World Health Organization (WHO). Esei tin keber ku e aspirashon di gobièrnu pa yega na un balans entre normanan akseptabel pa kalidat di aire i desaroyo ekonómiko. Reaktivashon di refineria ta forma parti di esaki.

Aktividatnan ku ta kontaminá medio ambiente, manera operashon di un refineria, di repente òf gradualmente por bin afektá interesnan protehá pa artíkulonan di e Tratado Europeo pa Derechonan Humano (EVRM), ku Kòrsou ta mará n’e. Ta trata di artíkulo 2 (derecho riba bida) i 8 (derecho riba rèspèt pa bida privá i familiar, i kas propio). Detayadamente e Konseho ta analisá e pregunta te unda e proyekto di lei riba eksihensianan pa kalidat di aire ta kompatibel ku artíkulonan 2 i 8 di EVRM. Refiriendo na vários sentensia di Korte Europeo pa Derechonan Humano (EHRM), e Konseho ta konkluí ku por tene kuenta ku motibunan ekonómiko den eskoho di medidanan ambiental, pero ku esaki no por hunga un papel desisivo.

Produkshon di e Konseho

Na 2023 Konseho di Konsulta a haña 33 petishon pa konseho i a finalisá 29. Konseho a manda tres petishon pa konseho bèk. Un di nan, pa motibu ku e vershon ku gobièrnu a manda di e proyekto di lei ku Konseho di Minister a akordá, no tabata e vershon final. E dos otronan, komo e preparashon atministrativo no tabata kompletu. Na final di e relato anual Konseho di Konsulta tabata tratando dos petishon pa konseho ainda, di kua un di nan a drenta na 2022.

Di e petishonnan pa konseho na 2023, por konsiderá 43.3% komo petishon urgente. Esei ta hopi mas ku e 23.3% di e aña anterior. Kon alarmante esei ta, por dedusí for di e trabounan ku e personal di sekretariado mester hasi pa por asistí e Konseho riba kontenido. Den e relato annual aki tambe e Konseho ta lusa e trabou indispensable di e kolaboradónan i e tempu ku nan mester pa por hasi esei kuidadosamente.

Relato annual 2023 riba website

Riba e website www.raadvanadvies.cw di Konseho di Konsulta por tuma nota di e relato anual kompletu di 2023. Tambe por tuma nota di e kontribushon temátiko di drs. Rob van den Bergh titulá: ‘Alkanse di e deber di kuido di gobièrnu; Sosten di gobièrnu pa mundu empresarial di Kòrsou.

Na nòmber di e presidente suplente di Konseho di Konsulta

Señora mr. C. Raphaëla, sekretario.