Komunikado di Prensa Relato Anual 2024 RvAC Tema Demokrasia

KOMUNIKADO DI PRENSA

Dia 10 di yüli 2025.

Dr. Brede Kristensen den Relato Anual di RvA:

Arte di skucha ta determinante pa demokrasia

WILLEMSTAD – “Demokrasia ta dependé di e mentalidat demokrátiko ku partisipashon ta aktivá: e disponibilidat pa skucha otro i pa satisfasé e nesesidat di partisipashon demokrátiko.” Esei ta e konklushon di e filósofo, sosiólogo i politikólogo dr. Brede Kristensen den un ensayo ku el a skirbi riba título personal i ku ta forma parti di e Relato Anual 2024 di Konseho di Konsulta Kòrsou (RvA). Primordialmente for di e perspektiva konstitushonal, RvA den un posdata ta bini ku algun remarke krítiko enkuanto e aktual práktika demokrátiko na nos isla.

Bou di e título ‘Democratie is tijdloos menselijk’ (‘Demokrasia ta eternamente humano’) dr. Kristensen ta boga pa promové demokrasia ku aktualmente globalmente ta tópiko di debate. “Demokrasia no ta garantia pa bon gobernashon, pero e ta brinda mas kontròl i posibilidatnan pa korekshon ku e otro sistemanan i e por hasi siudadanonan mas ‘partisipante i esnan dentro di e sistema’”. El a enfatisá ku demokasia ta e sistema gubernamental mas bieu i mas original di sosiedatnan humano, ku diferente struktura ku a desaroyá na vários pais. Mantenshon kontinuo di e strukturanan aki ta esensial pa su sobrebibensia.

Distansia kla
Segun dr. Kristensen, ta krusial ku e poder ehekutivo (gobièrnu) ta keda na distansia di e poder legislativo (parlamentu), di moda ku parlamentu por keda desempeñá su papel di partner krítiko di kòmbersashon di gobièrnu. No ta deseabel ora gobièrnu hala orea di miembronan di Staten di koalishon komosifuera ku ta nan obligashon di sostené gobièrnu sin mas. Mester tin un distansia kla tambe entre gobièrnu i gruponan di interes. Ta mina demokrasia na momento ku gobièrnu i parlamentu ta laga gruponan spesífiko, ku ta pone nan interes propio riba interes di públiko, influensiá nan. “Toma di desishon polítiko ta un kestion di midi interes i balornan. Pa esei mester skucha tur esnan interesá”, segun dr. Kristensen.

Elekshonnan liber i regular pa Staten
Un otro punto importante ta e proseso hudisial independiente. Dr. Kristensen ta prekupá pa e intentonan resien pa tòrnu na e independensia aki, spesialmente di parti di lidernan polítiko. E ta mustra tambe riba e importansia di elekshon liber i honesto ku ta obligá gobernantenan pa duna kuenta i rason. Sinembargo, e ta remarká tambe ku e gastunan haltu pa téknikanan di propaganda por menasá demokrasia. Den esei e polítikonan ta purba pa diferente forma di hasi propaganda polítiko pa logra sosten di e siudadanonan. Dr. Kristensen ta krítiko tambe riba finansiamentu desigual di kampañanan elektoral, loke na su opinion ta forma un menasa pa un proseso honesto. “Si nos ke skapa demokrasia, lo mester re-aktivá e kòmbersashon ku e siudadanonan”, e ta deklará.

Responsabilidat di ministernan
Un otro punto di prekupashon di dr. Kristensen ta e falta di atenshon pa krítika di instansianan kontroladó, manera Kontrolaria General (‘Algemene Rekenkamer’) i Defensor di Pueblo (‘Ombudsman’). Ta aparesé ku gobièrnu ta deskuidá e rekomendashonnan di e instansianan aki, i Staten no tin sufisiente poder pa obligá gobièrnu pa tuma e rekomendashonnan aki na serio.

Libertat di Prensa
Den un posdata na e ensayo RvA ta mustra riba situashonnan na Kòrsou kaminda e prinsipionan demokrátiko ta bou di preshon. Manera libertat i independensia di prensa ta forma un punto importante. Hopi biaha gobernantenan no ta gusta informenan krítiko i ta ekskluí kanalnan di medio ku kritiká nan, for di suministro di informashon, f ta purba desakreditá nan. Na mes momento nan ta hasi mas i mas uso di medionan sosial pa proklamá maneho i puntonan di bista polítiko. Ora den esei, nan ataká indivíduo òf organisashonnan, ta difísil pa eseinan defendé nan kurpa, pasobra e atakenan aki ta tuma lugá atraves di kanalnan informal di komunikashon.
Gobièrnu su tarea ta pa sirbi interes di pais, midiendo e diferente interesnan i tumando desishonnan bon ekilibrá. Ta spera di gobièrnu ku e ta transparente i ta splika tantu na parlamentu komo na komunidat kon a yega na sierto desishon. Esaki den muchu kaso no ta sosodé. Esensial ta tambe ku ta envolví siudadanonan den asuntu di gobernashon, por ehèmpel pa medio di prosedimentunan di partisipashon públiko i leinan enkuanto transparensia di gobernashon. Sinembargo, hopi be nan ta eksperensiá esaki komo molestoso, miéntras ku base di demokrasia ta hustamente ora e siudadanonan ta dispuesto pa partisipá na e proseso. Un demokrasia sano tin mester di un aktitut i kultura ku ta basá riba diálogo, empatia i ta dispuesto pa yega na kompromiso.

Separashon di poder
Segun ‘trias politica’ (e separashon di poder: gobiernu, parlamentu i korte di hustisia), parlementarionan ophetivamente i ku interes general na bista mester supervisá gobernashon, hasta si e gobernantenan ta di nan mes partido. Sino parlamentu ta fungi únikamente komo ‘rubberstamp’. Pa e ‘checks & balances’ tin órganonan independiente di konseho i kontròl ku ta supervisá riba garantia di bon gobernashon. Ora no hasi kaso di e rekomendashonnan, esaki ta mina e estado di derecho.
E estado di derecho ta protehá siudadanonan kontra kapricho di estado i no mag desbordá den tirania di mayoria, kaminda ta tacha derechonan di gruponan minoritario. E último dékadanan por opservá na Kòrsou kada bes mas ehèmpel di e tendensia aki. Esnan na poder tambe mester atené na lei i reglanan, i poder hudisial mester por evaluá nan akshonnan. Si deskuidá esei, no ta sobra mashá di e estado di derecho. E eskala chikitu di e komunidat di Kòrsou ta hasi ku e proseso demokrátiko aki èkstra vulnerabel. Un gobièrnu ku no ta respetá e prinsipionan fundamental aki, ta mina e órden demokrátiko di derecho.
Finalmente RvA ta spera ku e ensayo di dr. Kristensen ta provoká un interkambio mas ámplio di pensamentu – un diskushon ku ta fomentá i, kaminda por, reforsá demokrasia.

Na nòmber di presidente suplente di Konseho di Konsulta Kòrsou
Señora mr. C. Raphaëla, sekretario