Komunikado di Prensa Relato Anual 2025 RvAC Tema Pobresa

KOMUNIKADO DI PRENSA

Dia 12 di novèmber 2026.

Simposio dia 19 di novèmber na Renaissance Resort

Konseho di Konsulta di Kòrsou ta bai mas

hundu den fundeshi di demokrasia

WILLEMSTAD – Probechando di e oportunidat ku e konsehonan di konsulta di Reino Hulandes ta na Kòrsou pa interkambio periódiko, Konseho di Konsulta di Kòrsou (RvAC) ta organisá un simposio tokante demokrasia titulá: We are Democracy. Djaweps dia 19 di novèmber awor oradornan invitá lo trata dos tema derivá di esei den Atrium di Renaissance Wind Creek Curaçao Resort. Eks-presidente di University of Sint Maarten, señor Antonio Carmona Báez, Ph. D ta atendé e suptema ‘E Kontrapoder di Siudadanonan’ i e spesialista Arubano di derecho konstitushonal, awor ligá ku University of Curaçao, mr. dr. Ryçond Santos do Nascimento, lo drenta mas den e suptema ‘Libertat di Ekspreshon, Asosiashon i Manifestashon na Peliger?’.

Ku RvAC ta duna gran importansia na demokrasia ta resaltá for di e echo ku el a skohe ‘demokrasia’ komo tema pa su relato anual di 2024. Despues ku eiden e sosiólogo i politikólogo dr. Brede Kristensen a plantia ku partisipashon ta stimulá e mentalidat demokrátiko, RvAC mes den un epílogo den e relato a tira un bista krítiko riba e práktika demokrátiko na Kòrsou. Por ehèmpel, nan a konstatá ku e prinsipionan demokrátiko ta den pèrtá. Manera, ora mandatarionan no apresiá informenan krítiko, ora nan desakreditá  medionann (konvenshonal) i nan operá di forma populista fuera di kuadronan hurídiko. Por agregá uso deskontrolá di medionan sosial informal pa anunsiá medida gubernamental i opinion polítiko. Apliká medionan sosial komo instrumento di merkadeo tin ademas komo desbentaha ku persona i instansianan ataká difisilmente por defendé nan mes. RvAC a menshoná tambe ku hopi biaha tabata konsiderá e prosedimentunan pa duna siudadano un bos, komo molèster.

Oradornan invitá

Riba 19 di novèmber sala ta habri 4 or di atardi pa e simposio. Promé, moderador Jefka Alberto ta anunsiá e palabranan di bonbiní di visepresidente di RvAC, mr. drs. Ludmila Vicento, pa despues e introdusí e oradornan invitá. Na fin di nan presentashon por interkambiá di opinion ku otro na Papiamentu, Hulandes òf Ingles.

Señor Carmona Báez lo splika kon indespensabel kontrapoder ta den un demokrasia ku ta funshoná bon. Partisipashon di siudadano mester nifiká mas ku depositá bo voto un biaha den kuater aña. Partisipashon ta kontribuí na un atministrashon públiko mas honesto i mas responsabel. Komo prekondishon tin ademas libertat di prensa i espasio pa opinion di esnan den minoria. Siudadanonan krítiko i na tinu ta kontribuí na un mentalidat demokrátiko, algu ku mester kurashá.

E presentashon di señor Ryçond Santos do Nascimento lo trata e tendensianan pa mishi ku derechonan fundamental; entre nan e derecho pa ekspresá libremente, pa organisá i pa manifestá. Esei por sosodé por ehèmpel ora perhudiká sierto periodista direktamente òf indirektamente, manera keda sin invitá nan pa rueda di prensa.

Ta klousurá e simposio ku un resepshon pa tur e presentenan.

Variedat amplio di invitado

Pa e simposio aki a saka invitashon pa tur representante di e Trias Politica, esta ministernan, miembronan di Staten, miembronan di Korte di Hustisia, miembronan di Konsehonan di Konsulta di Aruba, Sint Maarten i Kòrsou i di Raad van State na Den Haag, mas un variedat amplio di representante di diferente organisashon sosial i prensa lokal.

Otro interesadonan tambe por asistí na e simposio. Den korantnan lokal lo pone aviso ku un kódigo di QR pa esnan interesá por registrá, pasobra registrashon ta obligatorio en bista di e espasio limitá.

Na nòmber di e visepresidente di Konseho di Konsulta di Kòrsou

Señora mr. C. Raphaëla, sekretario.