Komunikado di Prensa Relato Anual 2025 RvAC

KOMUNIKADO DI PRENSA

Dia 12 di Ougùstùs 2026

Konseho di Konsulta Kòrsou:

Koperashon ta esensial pa bon kalidat di legislashon

WILLEMSTAD – Derechonan fundamental sosial ta resaltá prominentemente den e relato anual 2025 di Konseho di Konsulta. Oumentonan di preis i inseguridat kousá pa konfliktonan mundial, ta pisa mas ainda riba hendenan ku ya ta den pèrtá. Konseho ta afirmá ku kombatimentu di pobresa no ta kestion di un opshon polítiko. Segun konstitushon di Kòrsou, gobièrnu tin e deber di garantisá seguridat di eksistensha di pueblo den e sentido amplio di palabra. Mester evitá si ku esaki ta bin stanka den análisis i diseño di maneho so. P’esei Konseho ta boga pa un koperashon fuerte entre gobièrnu, sektor empresarial i organisashonnan sosial. E urgensia pa duna kontenido sólido na derechonan fundamental sosial na Kòrsou, ta keda ampliamente respaldá den e relato anual akí pa tres ensayo komplementario, for di perspektivanan di derecho humano, statístiko i sosial.

Masterclass pa koperashon mas efektivo

Derechonan fundamental a keda tratá tambe den e eksitoso masterclass Derechonan Humano, ku sekretariado di e Konseho a organisá na novèmber 2025. Tabatin 28 partisipante di diferente servisio públiko ku ta enbolbí den e proseso di legislashon. E posibilidat di partisipashon na e tipo di masterclass akí pa servisionan públiko enkargá ku legislashon i regulashon, ta yuda halsa kalidat di legislashon i regulashon, teniendo kuenta tambe ku tratadonan di derecho humano. Banda di esei e masterclass a duna oportunidat pa fortalesé i profundisá e koperashon ku e servisionan públiko enbolbí ainda mas. E masterclass tabata na enkargo di prof. mr. A. Schilder.

Kalidat di proyektonan di inisiativa

Partikularmente e kalidat di proyektonan di inisiativa ta keda un punto di atenshon. Husga un proyekto di inisiativa ku un òf mas miembro di Staten presentá pa haña konseho, ta kosta mas tempu ku husga proyektonan di lei ku gobièrnu entamá. Hopi biaha ta resultá ku tin fout òf inklaridat aden, hasta despues ku Konseho di Konsulta a konsehá riba dje.

Esaki ta lansa e pregunta si mester bini normanan pa proyektonan di inisiativa, meskos ku tin kaba pa proyektonan di lei ku gobièrnu a entamá. Pa proyektonan di lei e proseduranan vigente ta stipulá den un Guión Sirkular riba regulashon for di novèmber 2024. A base di esei gobièrnu ta duna kuenta den un rapòrt komplementario di e manera ku e ta prosesá e konsehonan di Konseho di Konsulta. Si bini normanan kla pa proyektonan di inisiativa tambe, e Sekretario di Staten (Griffier) por guia e miembronan di Staten mihó ora di redaktá nan. E ora ei por husga mihó tambe kon e inisiadornan ta prosesá e konsehonan di Konseho di Konsulta.

Komunikashon ku grupo metanan

Konseho di Konsulta ta duna hopi importansha na un bon entendimentu entre tur

esnan enbolbí den e proseso legislativo. Riba invitashon di e Sekretario di Staten, Konseho a duna un presentashon riba su funshon dentro di e estado di derecho di Kòrsou. Tambe Konseho a papia ku un delegashon di Staten riba asuntunan di durashon largu ku por influenshá e kalidat di leinan nashonal di inisiativa proponé. Ta trata partikularmente di e kalidat di proyektonan di inisiativa, un trayekto pa reforsá e konosementu di miembronan di Staten riba tereno di legislashon, i reklutashon di eksperto pa asesorá miembronan di Staten den e proseso di traha legislashon.

Den un enkuentro ku Konseho di Minister tambe a toka temanan ku ta surgi kada bes. Un ehèmpel ta e konstante kantidat haltu di petishon pa konseho urgente, hopi biá sin ku gobièrnu ta motivá nan urgensia. Esei sa pone ku ta difísil pa Konseho determiná kon válido e nesesidat ei ta, i pa duna konseho minusioso tòg dentro di un término mas kòrtiku. Konseho di Konsulta ta trese dilanti ademas ku mester konsult’é di nobo ora gobièrnu hasi kambionan supstansial den proyektonan di legislashon i regulashon, despues ku Konseho a konsehá riba eseinan kaba. Partikularmente ora e kambionan ta pará lòs di e konseho ku Konseho di Konsulta a duna anteriormente.

Medionan di komunikashon i públiko en general

Tur aña Konseho di Konsulta ta saka dos komunikado di prensa huntu ku su relato anual digital. Un komunikado tokante desaroyonan interno den e Konseho i unu tokante e ensayo komplementario añadí na e relato anual.

Ku e meta pa e mes tambe komuniká direktamente ku públiko, Konseho a disidí entre otro pa pone un video animá na Hulandes i Papiamentu riba su website, ku ta fásil pa komprendé. Pa medio di pregunta i kontesta ta splika den e video kiko ta Konseho di Konsulta i kiko e ta para p’e.

Tambe Konseho a partisipá na sèptèmber 2025 na grabashon di e podcast ‘Ki Bo Ke Men’ di Direktorado di Komunikashon i Informashon (C&V) di gobièrnu. Den e podcast e visepresidente i e sekretario di Konseho di Konsulta ta papia entre otro riba e papel konsultativo di e Konseho i kon e trabou ei ta kana den práktika.

Operashon

Aña pasá Konseho di Konsulta a risibí 24 petishon pa konseho i a finalisá 26. Esei ta inkluí petishonnan ku a keda presentá na Konseho anteriormente. Kuater di e petishonnan ku Konseho di Konsulta a haña na 2025, tabata pendiente ainda na final di e aña kubrí den e relato. Tratamentu di petishonnan pa konseho ta enserá debido preparashon pa hasi investigashon, partikularmente dor di kolaboradornan di sekretariado ku ta apoyá Konseho tokante e kontenido. Aparte di un estudio profundo di e legislashon proponé, ta hasi un análisis minusioso tambe di e kestion ku e ta basá riba dje. P’esei ta konsultá literatura i hurisprudensia relevante.

Presidente i visepresidente nobo di Konseho di Konsulta

Dia 20 di novèmber 2025 Konseho di Konsulta a hiba un kombersashon orientativo ku Su Ekselensia mr. Mauritsz de Kort, e gobernador nobo di Kòrsou. Pa konsepto di su funshon, Gobernador De Kort ta presidente di Konseho di Konsulta. Den e promé interkambio di idea ei a papia riba diferente tópiko, por ehèmpel e manera ku Konseho ta ehersé su tarea i papel den práktika, e produkshon legislativo i e estado di demokrasia na Kòrsou.

Seis luna despues mr. drs. Ludmila Vicento a asumí e puesto di visepresidente. Den su introdukshon di e relato anual 2025 e ta gradisí e visepresidente anterior, mr. Lizanne Dindial, pa su aporte profeshonal i gran dedikashon na Konseho di Konsulta durante e último 15 añanan.

Konseho di Konsulta tin 9 miembro

Konseho di Konsulta Kòrsou ta konsistí aktualmente di visepresidente mr. drs. Ludmila Vicento i e miembronan dr. Jeffrey Sybesma, drs. Charlene Alberto, mr. Wilfred Flocker, Michael Willem MA, mr. Luigi Virginia, drs. Josephine Provence, ing. Gregory Damoen MSc i drs. Bryan Iransquin. Sekretario di Konseho di Konsulta ta mr. Cadlyn Raphaëla ku un staf ku ta asistí e Konseho.

Na nòmber di e Visepresidente di Konseho di Konsulta Kòrsou

Señora mr. C. Raphaëla, sekretario.