Persbericht Jaarverslag 2021 Papiaments

KOMUNIKADO DI PRENSA 24 di mei 2022.

Relato anual 2021 di Konseho di Konsulta: Oumento di konsehonan no solisitá

WILLEMSTAD – Normalmente Konseho di Konsulta di Kòrsou (Raad van Advies Curaçao, RvAC) ta masha kouteloso pa duna Gobièrnu konseho sin ku nan a pidi p’e, pero na 2021 esei a sosodé tòg na sinku okashon. Den e relato anual mas resien ku a saka e siman aki, a para ketu detayadamente na e dato remarkabel aki.

Den e aña tras di lomba RvAC a trata 28 petishon pa konseho; den 8 kaso tabata trata di un petishon urgente. Wèl ta asina ku esei tabata algu ménos ku den e promé aña di Covid-19, pero regularmente RvAC ta mustra ku e kondishon ta ku esnan ku hasi e petishon mester a hasi bon trabou prepatorio promé, miéntras ku nan mester splika tambe e nesesidat di un tratamentu rápido. Despues mester duna RvAC e tempu nesesario pa e bini dilanti ku un konseho bon deliberá. Ku regularidat Gobièrnu ta hañ’é den pèrtá di tempu, pero esei no por bai a kosto di kalidat di legislashon.Tòg RvAC a logra den tur ocho kaso pa reakshoná denter di tres siman riba petishonnan pa un konseho urgente. Komo ku RvAC den sentido general ta sigui pidi atenshon pa e nesesidat pa drecha kalidat di e proposishonnan di lei di inisiativa ku bini for di Staten, den e relato a hasi e sugerensia pa envolví huristanan legislativo den esaki òf pa entrená e konseheronan hurídiko di (miembronan di) Staten den konosementu di legislashon.

Konsehonan no solisitá

RvAC no ta obligá pa duna konseho solamente ora entregá proposishon di lei; di su mes tambe RvAC por bini ku konseho. Na 2014, 2015, 2017 i 2018 RvAC a apstené di duna konseho ku no a pidi p’e; na 2016 tabatin dos i tantu na 2019 komo na 2020 tabatin unu. Por lo general RvAC ta masha kouteloso pa saka un konseho sin ku a pidi p’e, loke ta reflehá den e kantidat abou di e tipo aki di konseho ku a saka den e añanan tras di lomba. Promé ku prof Rob van Gestel den su kontribushon temátiko na e relato anual aki a bini ku e rekomendashon pa bai hasi mas uso di e medio aki, RvAC na 2021 a duna Gobièrnu na sinku okashon un konseho no solistá. Aña pasá tabata trata di (1) legislashon ku a kaduká na e transishon pa e status outónomo di Kòrsou; (2) reglanan proponé pa entidatnan di Gobièrnu; (3) un konsepto di areglo pa renumerashon i penshun di mandatarionan; (4) un konsepto di areglo pa provishonnan pa miembro i èks-miembro di Staten; (5) i un biaha mas enkuanto e legislashon kaduká na e transishon di Antia Hulandes pa un struktura estatal nobo di Kòrsou.

Efekto di konsehonan

E Areglo di Estado i e lei enkuanto Konseho di Konsulta (RvAC) ta brinda e opshon pa duna konseho sin ku a pidi p’e. Na promé lugá e por pertenesé na e área di trabou di RvAC, esta legislashon i gobernashon. Na di dos lugá, por ta trata di un konseho en konekshon ku un trayekto di un proposishon di lei òf mester bai tokante un tópiko di hopi peso ku e Konseho di Konsulta ta konsiderá na interes di Kòrsou òf di Reino. Pa un konseho no solistá di e promé kategoria, RvAC a apliká un prosedimentu interno atraves di su propio gruponan di trabou. Si ta sinti nesesidat p’e, e ora ei e kestion ta bai den e reunion plenario di RvAC kaminda finalmente e desishon ta kai si i kon ta ofresé e konseho no pidí na Gobièrnu. Den kaso di un konseho no solistá di e di dos kategoria ta trata por ehèmpel di un konseho kaminda RvAC ta di opinion ku ta un kestion di aktualidat di karakter gobernamental-hurídiko kaminda a tene muchu tiki kuenta ku sierto aspekto, manera pa loke ta e kapasidat pa ehekutá un ke otro, òf ku retonan finansiero-ekonómiko di e Pais. No semper ta masha kla kiko e efekto di RvAC su konsehonan, pidí i sin ku a pidi pa nan, enkuanto e proposishonnan final di lei. Tin be por saka algu afó ora tuma nota di un parti di e aklarashon adaptá mará na e (konsepto di) areglo kaminda ta referí na rekomendashonnan di RvAC, loke nan ta yama ‘un relato adishonal’. Esaki por sirbi komo fuente pa e debate parlamentario ku mester sigui ainda riba un proposishon di lei asina.

Relato anual 2021 riba website

Riba e website www.raadvanadvies.cw di RvAC por tuma nota di e relato anual 2021 den su totalidat. Aya’den por tuma nota tambe di e kontribushon temátiko di prof Rob van Gestel titulá “Crisisklimaat of Klimaatcrisis?”.

RvAC temporalmente ta konsistí di 8 miembro

Aktualmente Konseho di Konsulta di Kòrsou (Raad van Advies van Curaçao, RvAC) ta konsistí di visepresidente Lizanne Dindial i e miembronan Jeffrey Sybesma, Charlene Alberto, Wilfred Flocker, Herbert van der Woude, Michael Willem, Luigi Virginia i Clarion Taylor. Entrante 11 di aprel 2021 a nombra señora Dindial dinobo pa un término di sinku aña den su funshon. For di e konsiderashonnan pa redusí gastu na 2021 i pa 2022 a lebumai nombra un di nuebe miembro di e Konseho, aparte di e echo ku e aktual ocho miembronan a entregá riba nan renumerashon. Sekretario di RvAC ta Cadlyn Raphaëla ku un staf ku ta asistí e Konseho.

Pa su funshon Ekselensia Gobernador Lucille George-Wout ta presidente di e kolegio aki. Aña pasá nan a interkambiá di idea kuné tantu na yüli komo na desèmber.

Na nòmber di Visepresidente di Konseho di Konsulta

Señora mr. C. Raphaëla, sekretario