Persbericht Relato anual 2022 di Konseho di Konsulta Papiamentu

KOMUNIKADO DI PRENSA
Dia 24 di yüli 2023.

Relato anual 2022 di Konseho di Konsulta

Preparashon adekuá ta esensial
pa kalidat di legislashon

WILLEMSTAD – Entrega na tempu di petishonnan pa konseho i presentashon di proyektonan di reglamentu di bon kalidat, ta kondishonnan indispensabel pa funshonamentu di Konseho di Konsulta den su papel di vigilante di legislashon i regulashon. Esei por dedusí for di su relato anual di 2022, den kua e órgano di konsulta konstitushonal di gobièrnu i di Staten riba legislashon i gobernashon ta enfatisá alabes e importansia di independensia i imparsialidat di un Konseho krítiko. Na 2022 Konseho di Konsulta a haña 31 petishon pa konseho i a atendé 31. Ún petishon pa konseho el a manda bèk komo el a risibí diferente vershon di e proyekto, e memorándùm splikativo i aneksonan, i komo despues di un luna ainda gobièrnu no por a presentá e vershonnan korekto.

Importansia di un periodo rasonabel pa konseho
En general Konseho di Konsulta ta pone e kalidat di e proyektonan di reglamentu sentral. Un bon kalidat di legislashon i regulashon, i indirektamente tambe di atministrashon públiko, ta eksihí un preparashon sólido. P’esei tur partisipante den e proseso di legislashon mester di sufisiente tempu pa prepará. Esei ta konta pa Konseho di Konsulta tambe komo e órgano di konsulta mas haltu i final. Pa por duna konsehonan responsabel, entre otro ta hasi un investigashon kuidadoso di e asuntu ku a kondusí na e legislashon nobo i ta konsultá literatura i hurisprudensia relevante. Esei ta na enkargo spesialmente di e kolaboradónan di sekretaría ku ta sostené Konseho di Konsulta riba kontenido.
Dependiendo di e kontenido di e petishonnan pa konseho presentá, Konseho di Konsulta ta fiha komo norma un periodo pa konseho di maksimalmente tres luna pa petishonnan regular i maksimalmente seis siman pa petishonnan urgente. Na 2022 e periodo pa konseho realisá tabata konsiderablemente mas abou: un promedio di shete siman pa petishonnan regular i tres siman i mei pa petishonnan urgente.

Un tratamentu rápido no mester bai a kosto di kalidat di ningun manera. Konseho di Konsulta ta haña esei partikularmente inaseptabel ora ku tardansa den e trayekto di preparashon ta pone èkstra preshon riba e kalidat di konsulta den petishonnan pa konseho urgente. Por ehèmpel, Konseho di Minister a disidí for di 17 di ougùstùs 2022 pa kalifiká e asina yamá ‘monkeypox virus’ komo un enfermedat kontagioso pa lei, i pa apliká un ordenansa di 1921 den kombatimentu di e virus. Despues di tres luna i mei numa, dia 2 di desèmber 2022, Konseho di Konsulta a haña un petishon pa konseho riba esei. Mirando importansia di un base legal pa eventual medida pa kombatí e virus, Konseho di Konsulta a duna konseho urgentemente no opstante e tardansa. Esei Konseho lo sigui hasi den futuro tambe den kasonan similar. Tòg Konseho ta mustra riba e hecho ku nèt den situashonnan di urgensia manera esaki ta di importansia krusial pa gobièrnu pa aktua diligentemente. P’esei den e relato anual aki Konseho di Konsulta ta bolbe mustra riba e nesesidat pa supervisá e progreso di reglamentonan legal.

Garantia di independensia i imparsialidat
Konseheronan krítiko i independiente, manera Konseho di Konsulta, ta forma un elemento importante den e sistema di ‘checks and balances’. Dor di esei e konfiansa den e Konseho mester keda garantisá sémper. P’esei no ta evaluá solamente e ekspertisio di miémbronan aspirante, sino tambe nan independensia i neutralidat. Asina ta husga kaso pa kaso si eventual otro funshon di e miémbronan òf nan esposo / esposa òf yunan menor di edat, por enserá un riesgo di konflikto di interes. Te na unda tòg tin konflikto di interes òf ta parse ku por tin, Konseho di Konsulta a fiha regla di kondukta pa atendé esei. Ta evaluá e reglanan ei periódikamente i ta adaptá nan kaminda ta nesesario. Pero e efektividat di trabou di e konsehero legislativo no ta dependé solamente di e kalidat di su trabou, sino tambe di e konteksto polítiko-gubernamental den kua e ta funshoná. Pasobra e konsehero por ehersé su funshon na un forma signifikativo solamente si e aktornan den e trayekto legislativo ku sí tin poder di desishon, ta dispuesto pa reakshoná adekuadamente riba su konklushonnan i konsehonan.

E nesidat pa mehorá e funshon legislativo
Konseho di Konsulta ta mustra riba diferente kriterio ku un bon kalidat di legislashon mester kumpli kuné. Por ehèmpel, leinan mester respetá tratadonan internashonal i legislashon nashonal mas haltu, manera respektivamente e Tratado Europeo pa derechonan humano i Konstitushon di Kòrsou. Tambe mester definí e meta ku ke logra ku e leinan di un forma kla i mester por ehekutá, mantené i kontrolá nan debidamente. Legislashon di bon kalidat mester kumpli tambe ku prinsipionan general di derecho, manera e prinsipio di proporshonalidat, e prinsipio di seguridat hurídiko i e prinsipio di igualdat. Konseho di Konsulta ta lamentá e hecho ku no ta hasi sufisiente uso di instrumentonan eksistente pa garantisá kalidat di legislashon, manera e Instrukshonnan pa legislashon ku gobièrnu a fiha i ku na su opinion ministerionan no ta apliká sufisientemente.

Konseho di Konsulta ta konstatá ku no ta solamente e kalidat di legislashon a baha, sino tambe e kantidat. Esei ta entre otro komo den e dos último añanan aki produkshon di lei a traha lugá pa redaktá dekretonan ministerial ku funshonamentu general, ku no mester presentá na Konseho di Konsulta. Pero e bahada di petishonnan pa konseho tin ke ber tambe ku problemanan den e trayekto di legislashon, prinsipalmente riba tereno di organisashon i personal. Asina un rapòrt di prof. mr. S. E. Zijlstra tokante e kapasidat di legislashon na Kòrsou (2021), ta mustra riba fayo den e konosementu hurídiko i eksperiensha dentro di gobiernu, rondanan inesesario di konseho, i e hecho ku muchu biaha ta laga hende eksterno traha legislashon. E rapòrt ta duna rekomendashon tambe pa mehorá e trayekto di legislashon i awor ta na gobièrnu pa ehekutá esaki. Pa Konseho di Konsulta, kalidat di legislashon ta keda un punto di atenshon, tantu pa efektividat di lei komo pa legitimidat di gobernashon.

Relato anual 2022 riba website
Riba e website www.raadvanadvies.cw por tuma nota di e relato anual kompletu di 2022. Tambe por tuma nota di e kontribushon temátiko di mr. dr. Aubrich Bakhuis titulá ‘De vormvrije onderlinge regeling als alternatief voor de consensusrijkswet: meer autonomie, minder democratie?’

Konseho di Konsulta temporalmente ku 8 miembro

Konseho di Konsulta di Kòrsou ta konsistí aktualmente di e presidente suplente Lizanne Dindial i e miembronan Jeffrey Sybesma, Charlene Alberto, Wilfred Flocker, Herbert van der Woude, Michael Willem, Luigi Virginia i Clarion Taylor. Konsiderando un redukshon di gastu a disidí pa no apuntá e di nuebe miebro di e Konseho pa 2021 ni 2022. Sekretario di Konseho di Konsulta ta Cadlyn Raphaëla ku un staf pa asistí Konseho. Pa konsepto di su funshon, su Ekselensia Gobernador Lucille George-Wout ta presidente di e kolegio aki. A interkambiá di idea kuné tantu na mei komo na novèmber di aña pasá.

Na nòmber di e presidente suplente di Konseho di Konsulta
Señora mr. C. Raphaëla, sekretario.